സ്വർണ വില ഇന്നും പുതിയ റെക്കോർഡില്‍: എന്റെ പൊന്നേ.. എങ്ങോട്ടാണ് ഈ കുതിപ്പ്: ആദ്യമായി 1.05 ലക്ഷം കടന്നു
സംസ്ഥാനത്ത് സ്വര്‍ണവിലയില്‍ ഇന്നും വര്‍ധനവ്. തുടര്‍ച്ചയായ അഞ്ചാം ദിവസമാണ് വില ഉയര്‍ന്നുതന്നെ നില്‍ക്കുന്നത്. 2025 ഡിസംബര്‍ അവസാനത്തോടെ സ്വര്‍ണവില ഒരു ലക്ഷം തൊട്ടിരുന്നു. 2026 ജനുവരിയിലും വിലയില്‍ വന്‍ കുതിച്ചുചാട്ടമാണ് ഉണ്ടായിക്കൊണ്ടിരിക്കുന്നത്. പവന് 830 രൂപയാണ് ഇന്ന് കൂടിയിരിക്കുന്നത്. രാജ്യാന്തര വിപണിയില്‍ വില വര്‍ധിച്ചതാണ് കേരളത്തിലും വില ഉയരാന്‍ കാരണം. വരും ദിവസങ്ങളിലും വില ഉയരുമെന്ന് തന്നെയാണ് വിദഗ്ധര്‍ പറയുന്നത്. വില ഓരോ ദിവസവും ഉയരുന്നത് സ്വര്‍ണാഭരണം വാങ്ങാന്‍ ആഗ്രഹിക്കുന്നവര്‍ക്ക് ഒരു വെല്ലുവിളിയാണ്.
ഇന്നത്തെ സ്വര്‍ണവില
ഇന്ന് 22 കാരറ്റ് സ്വര്‍ണം പവന് 105,320 രൂപയാണ് വിപണി വില. കേരളത്തിലെ സ്വര്‍ണവിലയിലെ എക്കാലത്തെയും ഉയര്‍ന്ന നിരക്കാണിത്. ഒരു ഗ്രാം സ്വര്‍ണത്തിന് 13165 രൂപയാണ് ഇന്നത്തെ വില. ഇന്നലെ 13065 രൂപയായിരുന്നു. 100 രൂപയുടെ വര്‍ധനവാണ് ഗ്രാമിന് ഉണ്ടായിരിക്കുന്നത്. 830 രൂപയാണ് പവന് വര്‍ധിച്ചിരിക്കുന്നത്. ഒരു ഗ്രാം 18 കാരറ്റ് സ്വര്‍ണത്തിന് 10920 രൂപയാണ് ഇന്നത്തെ വില. പവന് 87, 360 രൂപയും. വെള്ളി വിലയിലും വര്‍ധനവുണ്ടായിട്ടുണ്ട്.