അല്‍മാഡ അര്‍മാദം! ഉറുഗ്വേയ്‌ക്കെതിരെ ഉജ്ജ്വല വിജയവുമായി അര്‍ജന്റീന
ഉറുഗ്വേയ്‌ക്കെതിരായ ഫിഫ ലോകകപ്പ് യോഗ്യതാ പോരാട്ടത്തില്‍ ഉജ്ജ്വല വിജയവുമായി അര്‍ജന്റീന. ലാറ്റിന്‍ അമേരിക്കാ യോഗ്യതാ റൗണ്ടില്‍ ക്യാപ്റ്റന്‍ മെസ്സിയില്ലാതെ ഇറങ്ങിയ നീലപ്പട ഒരു ഗോളിനാണ് ഉറുഗ്വേയെ തകര്‍ത്തത്. കരുത്തരായ ഉറുഗ്വേയ്‌ക്കെതിരെ നേടിയ വിജയത്തോടെ 2026 ഫിഫ ലോകകപ്പിന് യോഗ്യത നേടുന്നതിന് തൊട്ടരികിലാണ് നിലവിലെ ചാംപ്യന്മാര്‍.
യുവതാരം തിയാഗോ അല്‍മാഡയാണ് ആല്‍ബിസെലസ്റ്റുകള്‍ക്ക് വേണ്ടി വലകുലുക്കിയത്. മത്സരത്തിന്റെ 68-ാം മിനിറ്റില്‍ വിജയഗോള്‍ പിറന്നു. ജൂലിയന്‍ അല്‍വാരസിന്റെ അസിസ്റ്റിലാണ് അല്‍മാഡ അത്ഭുതകരമായി ഗോളടിച്ചത്.
മത്സരത്തിന്റെ ഇഞ്ചുറി ടൈമില്‍ അര്‍ജന്റീനയുടെ നികോളാസ് ഗോണ്‍സാലസിന് റെഡ് കാര്‍ഡ് കണ്ട് പുറത്തുപോവേണ്ടിവന്നു. ഉറുഗ്വേയുടെ നഹിതന്‍ നാന്‍ഡസിനെതിരെ ഫൗള്‍ ചെയ്തതിനാണ് ഗോണ്‍സാലസിനെതിരെ റഫറി റെഡ് കാര്‍ഡ് ശിക്ഷ നല്‍കിയത്. അവസാന രണ്ട് മിനിറ്റുകളില്‍ അര്‍ജന്റീന പത്ത് പേരായി ചുരുങ്ങിയെങ്കിലും വിജയം സ്വന്തമാക്കുകയായിരുന്നു.