മകരവിളക്ക്; സ്പോട്ട് ബുക്കിങ്ങിലടക്കം നിയന്ത്രണം വേണമെന്ന് ഹൈക്കോടതി

മകരവിളക്കിനോടനുബന്ധിച്ച് സന്നിധാനത്ത് തിരക്ക് വർധിച്ച സാഹചര്യത്തിൽ ജനുവരി 12ന്​ മുമ്പുതന്നെ സ്പോട്ട് ബുക്കിങ്ങിലടക്കം നിയന്ത്രണം ഏർപ്പെടുത്തുന്നത് പരിഗണിക്ക​ണമെന്ന്​ ഹൈക്കോടതി. നിയന്ത്രണം നടപ്പാക്കുന്നത്​ സംബന്ധിച്ച്​ കൂടിയാലോചിച്ച് തീരുമാനമെടുക്കാൻ ജസ്റ്റിസ് അനിൽ കെ.നരേന്ദ്രൻ, ജസ്റ്റിസ് എസ്. മുരളി കൃഷ്ണ എന്നിവരടങ്ങുന്ന ഡിവിഷൻ ബെഞ്ച്​ നിർദേശിച്ചു.

പമ്പയിലെ സ്പോട്ട് ബുക്കിങ് നിലക്കലിലേക്ക്​ മാറ്റേണ്ടതുണ്ടെന്നും കോടതി നേരത്തെ അറിയിച്ചിരുന്നു.ശബരിമലയിൽ എത്തുന്നവരിൽ പലരും മകരവിളക്കിന് തൊഴുത് മടങ്ങാൻ വേണ്ടി അവിടെ തങ്ങുന്നതാണ് പ്രശ്നമാകുന്നതെന്ന് കോടതി കണ്ടെത്തി. വെർച്വൽ ക്യൂ, സ്പോട്ട് ബുക്കിങ് വഴി ഓരോ ദിവസവും എത്തുന്നതിനെക്കാൾ അധികം ഭക്തജനത്തിരക്കാണ് സന്നിധാനത്തുള്ളതെന്ന്​ കോടതി പറഞ്ഞു.