മൂക്കുതല സ്വദേശിയെ മസ്ജിദിനകത്ത് തൂങ്ങി മരിച്ച നിലയില്‍ കണ്ടെത്തി
May 13, 2025
ചങ്ങരംകുളം | മൂക്കുതല സ്വദേശിയെ മസ്ജിദിനകത്ത് തൂങ്ങി മരിച്ച നിലയില്‍ കണ്ടെത്തി. മൂക്കുതല വടക്കുമുറിയില്‍ താമസിക്കുന്ന കൊടക്കാട്ടുവളപ്പിൽ മുഹമ്മദി(70)നെയാണ് തൂങ്ങി മരിച്ച നിലയില്‍ കണ്ടെത്തിയത്. ചൊവ്വാഴ്ച ഉച്ചക്ക് 12 മണിയോടെയാണ് സംഭവം. മൂക്കുതല ലഡാക്ക് മുക്ക് എന്ന സ്ഥലത്തുള്ള സലഫി മസ്ജിദിനുള്ളിൽ വിശ്വാസികൾ നിസ്കരിക്കുന്ന ഹാളിലെ സീലിംഗ് ഫാനിലാണ് മുഹമ്മദിനെ തൂങ്ങിയ നിലയില്‍ കണ്ടത്.
ഉച്ചയ്ക്ക് ബാങ്ക് വിളിക്കാൻ എത്തിയ ആളാണ് ആദ്യം മുഹമ്മദിനെ തൂങ്ങിയ നിലയില്‍ കണ്ടത്. തുടർന്ന് നാട്ടുകാർ എത്തി ചങ്ങരംകുളം സൺറൈസ് ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. മോര്‍ച്ചറിയില്‍ സൂക്ഷിച്ച മൃതദേഹം ചങ്ങരംകുളം പോലീസ് ഇന്‍ക്വസ്റ്റ് നടത്തും. പോസ്റ്റുമോര്‍ട്ടത്തിന് ശേഷം ബന്ധുക്കള്‍ക്ക് വിട്ട് നല്‍കും.